بانوراما طرطوس:
سؤال استبيان بانوراما طرطوس للأسبوع الماضي كان مايلي: (بعد وعود الجهات المعنية بتحسين جودة رغيف الخبز في أفران القطاع العام والحد من التلاعب بوزن ربطة الخبز لدى الأفران الخاصة… هل لمستم تحسناً في هذا الموضوع؟).
في الحقيقة شكل الاستبيان مناسبة للكثير من القراء للتعبير عن معاناتهم المستمرة مع مادة الخبز حيث اتسمت معظم الآراء بالإنفعال والقسوة في الكلام إلى درجة لا يمكن نشره الكثير من الآراء …مع تمني بعض المواطنين عدم نشر أسمائهم…
القاسم المشترك لجميع الآراء تقريباً كان تحميل مديرية التجارة الداخلية “التموين” المسؤولية عن تردي وضع الرغيف حيث لا يوجد -برأيهم- اي تأثير لدوريات التموين على موضوع تحسين جودة الخبز ولا بإمكانهم التأثير على موضوع الالتزام بالوزن المعتمد!، وبالمقابل اشاد بعض المواطنين بالخبز المنتج لدى افران القطاع العام وخصوصا بموضوع الوزن…
أرقام ونسب من العينة:
60{844ffa2143412ea891528b2f55ebeeea4f4149805fd1a42d4f9cdf945aea8d4e} من بين الآراء (العينة)قالوا أن خبز الدولة جيد بينما 40{844ffa2143412ea891528b2f55ebeeea4f4149805fd1a42d4f9cdf945aea8d4e} قالوا انه سيئ.
78{844ffa2143412ea891528b2f55ebeeea4f4149805fd1a42d4f9cdf945aea8d4e} من القراء (العينة) قالوا إن خبز القطاع الخاص جيد بالنسبة للمواصفات بينما22 {844ffa2143412ea891528b2f55ebeeea4f4149805fd1a42d4f9cdf945aea8d4e} قالوا أنه غير جيد.
وبالمقابل وكما هو متوقع فقد اعرب96 {844ffa2143412ea891528b2f55ebeeea4f4149805fd1a42d4f9cdf945aea8d4e} من العينة أن هناك تلاعب واضح في وزن ربطة الخبز لدى افران القطاع الخاص..
آراء وتعليقات:
فيما بعض الآراء التي وصلتنا أو التي سألنا اصحابها ضمن العينة:
- (عماد حسن) خبز الدولة جيد وفي التزام بالربطة بالوزن اما خبز الافران الخاصة فهي جيدة كمان بس في سرقة كبيرة بالوزن وانا بستغرب كيف يعني ما بتوفي معهم اذا ما نقصوا بالوزن متل ما عم يحكو.
- (سليمان علي): سلامات في الحقيقة اسوأ رغيف خبز هو في محافظة طرطوس وخاصة فرن صافيتا الألي وأنا شخصيا استغرب لماذا نوعية الخبز في دمشق وحلب هو من النوع الابيض الممتاز ونحن هنا يفرض علينا الخبز الاسمر.
(سميره غانم) : في افران بالقطاع الخاص لازم يسكروها فورا والسرقة عينك عينك وكأنه ما في دولة وما في رقابة وكمان النفسيات روحو شوفو كيف بيسبو عالعالم واذا حدا حكي ماعاد الله يخلصو منهم وشو ما اشتكيت ما حدا بيرد عليك.- (موريس سلوم) : بالنسبة للخبز من الأفران يجب أن تكون مصارع أو مدعوم لتحصل على ربطة…والخصول عليها من الخارج وبسعر مرتفع ونوعية فقط لها منظر رغيف.. والله حرام عليهم قلة ضميرهم.
- ( مواطن….): رح احكي عن موضوع كتير مهم وهوي التلاعب بوزن الربطة من المعروف ان وزن الربطة هيي ١٣٠٠ غرام بسعر خمسين ليرة اللي رح احكيه عن فرن الفندارة الموجود ع دوار الفندارة يوجد بحقه اكثر من خمسين ضبط بيدفع الغرامة المالية طبعا وزن الربطة عندو ١٠٥٠ غرام بس هي بسعر ١٠٠ ليرة يعني ربطة الخمسين ليكون وزنها ٥٢٥ غرام ولا تقلي اشتكي اشتكيت وكل المحافظة بتعرف شو وضعو واديش ميسرق وكيف مينيم المخالفات والضبوطه بالمحكمة طبعا لو حاب التموين يضبطو فيه يصبطو فيه يبعت كل بوم دورية ويغرموه وحسب قاتون التموين الجديد عشر مخالفات بنفس الشهر بينسحب رخصة الفرن….
( مجد حسن ) بدك عالصراحة الدولة فيها تحل المشكلة مع الافران بس هيي مستفيدة منهم وكل ما اجت دورية عالفرن بياخدو المعلوم وبيرجعو بدك صبر يا وطن ويا اسفي على المواطن المعتر…- (كنان sul): بظل الظروف التي تمر بها البلد نعرف أنّ الأوضاع صعبة وأننا لا نعيش في بحبوحة وأننا نمر في ظروف استثنائية لكن هذه الظروف تكمن في تأمين مادة الطحين لكن صناعة الخبز فهي أمر داخلي وما يثير الاستغراب أنّه في أيام قليلة تكاد تكون معدومة يكون فيها الخبر أشبه ما يكون بالخبز السياحي نتيجة جودة تصنيعه من حيث السماكة وجودة الخبز والتصنيع أمام باقي الأيام فيتراوح الخبز بين الوسط الى المتوسط الضعيف.. خلاك عن أيام يكون فيها سيئ جدا هذا بالاضافة الى التأخر باحضار الخبز الى كوة البيع مما يولد أزمة ازدحام توتر المواطن الذي يعيش توتر دائم نتيجة الوضع المعاشي الصعب وتذبذب الاسعار باتجاه الأعلى طبعا هذا الكلام أخص به مخبز العريض الفني كوني لا أتعامل مع غيره نرجو أن يكون للصوت صدى ومشكورين سلفاً.
( علي sy ) خلي التموين والمحافظ يروحو يشوف فرن ابو عفصة والخبز اللي فيه الحيوانات ما بتاكلو- (وفاء خلوف): لا والله سيئ جدا
- ( سامر مهنا) شو يعني رح تكون نتيجة هالاستبيان!!!!!!!. متل قلتو لان المثل بيقول } الكلاب تنبح و القافلة تسير{.
- (ثريا طرطوس) لاوالله مو منيح
- ( علي حسن) افران الدولة تمام مع انو احيانا بيكون الخبز معجن ومو مستوي بس الحمد لله بشكل عام منيح الخبز
( انس ابراهيم) : عاجز اي حدا يحل مشكلة الخبز بطرطوس روحوا شوفو الخبز ما احلاها باللاذقية والا بحمص والا بالشام وبكل المحافظات الا عنا بطرطوس منضل فرق مابعرف لشو- ( احمد احمد) : الافران اللي فيها خبز منيح وبيتاكل بتلاقي الزحمة فيها رهيبة متل فرن التموين ومعقول ما فيهم يحلو مشكلة الزحمة والله حرام اما بالافران الخاصة فاذا ما اكلو نص الوزن ما فيهم ينامو
- (سمير. م) فرن صافيتا خبزو كتير منيح والله مع انو احيانا بيصدف انو مو منيح وكمان الوزن منيح ما حدا فيه يقول شي عنه.
- (هند حسن) : فرن البرانية خبزه منيح وكمان خبز الحاووز وبشكل عام الخبز منيح الحمد لله وبنشكركم على الاهتمام
- ( سمير سلوم) : احلى شي كل فترة منسمع في مخالفات وعقوبات بحق الافران المخالفة وكل هالعقوبات هيي وهمية ولا عم تعمل شي بدنا حل شامل لموضوع الخبز.
(حسين احمد) : كلا- ( علي حسامو) : لازم الدولة تخلي كل شي حر ولا تدعم اي سلعة وتخلي العرض والطلب وبنفس الوقت تقدم معونة مالية للعائلات الفقيرة وبهيك بيوصل الدعم للفقراء وكمان وقتها بتطبق الرقابة والعقوبات الكبيرة على الافران المخالفة وهذا افضل حل.
- (علي حسين) : السرقة ما في غير السرقة بالافران بالدولة……….. وبالقطاع الخاص ولا حدا عم يحاسب ولا حدا مهتم بالمواطن شو بدك عدلك لعدلك كل الافران كلها
- ( اكرم سعد) : خبز الدريكيش ما بيتاكل بالمرة ولا خبز صافيتا
- (الوردة الشامية) : الخبز منيح بطرطوس ومابعرف ليش ماعاجب الناس بس المشكلة الزحمة عالفرن.
- أخيراً.. هذه النتائج التي حصلنا عليها تعبر بشكل أو بآخر عن رأي شريحة معينة او عينة مختارة عشوائياً من المواطنين في مختلف انحاء المحافظة…. نضع النتائج والآراء برسم السيد محافظ طرطوس ومديرية التجارة الداخلية وحماية المستهلك بطرطوس..
