بانوراما طرطوس- راما عباس:
صبيتين راجعات من من مشوار علبيت…
_إستعجلي شوي يا أميرة إنشوينا من الشوب..!!
_ إي ليكني عم إستعجل تعبت من المشي.. شوصار رح نوصل..
_ يعني كان ضروري تتصلي فيه تشوفيه؟ نقعتيني ساعة لحالي ناطرتك..
_ إي شوفيا؟ مو إنتي رفيقتي وحبيبتي.. مين إلي غيرك أنا.. آ؟
_ إي إي إضحكي عليي.. إضحكي عليي بكلمتين حلوات.. المسا جهزي حالك جاي إسهر عندك، بدي تساويلي صينية حلو وغير هيك مارح إرضى..
_ لك تكرمي بساويلك شوكم مروة عندي أنا.. وأحلى أركيلة كمان.. بس ليكي إذا سأليتك إمي قوليلا رحنا لعند الخياطة بس لسى الفستان مو خالص..
_ يوووه وبدك إشهد زور كمان.. لك تزوجو بقى وخلصونا، إلكن خاطبين سنتين، هلق عجبو يتزاعل مع أبوكي..!!
_ بيتصالحوا بيتصالحوا.. كل مرة هيك.. يلا هانت ماتخافي.. أخوه عطاه مبلغ ورح ينحل كلشي، وإلك عندي حلوان مرتب بس إدعيلي..
_ إذا هيك ياااارب يكملا معكن ونفرحلكن… وآكل الحلوان.. لك أنا بحب الحلو كتير..
_ ههههه.. انشالله.. يلا هس وصلنا.. متل ماوصيتك ها.. وناطرتك بالسهرة لاتتأخري..
_ إي إي.. لاشوإتأخر أعوذ بالله في صينية حلو بالنص..
_ هههه.. الله معك ناطرتك..
_ باااي..
