بانوراما طرطوس- دارين العبود:
_ شو القصة ياغادة؟؟! هي خامس مرة بتطلعي بالمراية..يعني لساتنا بأول الدوام وماحلو ينتزع شعرك ومكياجك..
_ خلص سعاد اتركيني بهمي.. موناقصة خالص..
_ له له له… ليش مزعوجة إحكي…شوصاير معك من الصبح!!
_ شوفيني اتطلعي فيي منيح.. من شو بشكي أنا؟؟ ضليت ساعة عم ساوي شعري ومكياجي قبل ما إطلع من البيت..
_ أيوااااا…. رجعنا على قصة سليم من جديد؟؟! هاتي لشوف احكيلي شوحكيتو؟
_ مستحيل ياسعاد هل شخص هادا…!!! صرلي ست شهور عم حاول لمحلو إني بحبو ومعجبة فيه… الصبح بتقصد إطلع على طلعتو من البيت… وبحكم إنو جيران بسلم عليه وبسألو عن أخبارو…وبضل ابتسملو… وهوي ولا على بالو ولا بيظهرلي شي…
_ ياغادة ياحبيبتي.. تقلي حالك شوي خليه يحس بغيابك كام يوم.. بعدين إنتي حلوي ومو ناقصك شي، يعني خلص ماعاد تشوفي غيرو؟!!
_ العمر عم يمضى..عم نكبر… إي بعدين أنا ماحسيت إتجاه حدا متلو.. كلشي فيه عاجبني وموظف متلي..
_ بس عايش مع أهلو…يعني شوبيعرفك إذا مأمن وضعو أو لأ؟؟
_ معليش معليش…منتساعد أنا وياه… وبيصير عنا بيت، شو فيا يعني…. المهم نكون متفاهمين مافي فرق بيناتنا..
_ هههههههههه لك شبك ولله يلي بيسمعك بيقول خلص حكيتو وصارنصيب.. لك كل علاقتكن مابتتخطى مسافة الطريق من باب البناية لراس الشارع…هههههه يبعتلك الهنا ياغادة..
_ عم تضحكي…. بسيطة ياسعاد.. بكرى شوفي كيف رح يمشي الحال ويحبني متل مابحبو…
_ ياستي أنا بتمنى يصير هل شي.. مشان ناكل الحلوان…
_ إي وأنا رح حليكي سلف… عازمتك اليوم تتغدي عندي بعد الدوام…
_ إي ووين الحلو بالموضوع..!!
_ لاتخطفي الكباية من راس الماعون متل عادتك… لاتخافي بعد الغدا وحياتك..
_ إي وأنا قبلت العزيمة.. الله يديم التفاؤل يارب…
_ آمين….
