بانوراما طرطوس- راما عباس:
على شو عم تتفرجي..؟ فرجينا معك…
_ على صور فستاتين عرس بتجنن.. تعو شوفو هل موديلات بتاخد العقل..
_ فرجيني… إي ولله هادا داخلو دانتيل كتير ناعم..
_ شوفو هادا أديش هل فلل محلايينو..
_ ياسلاااام شهونا نرجع نعمل عرس من أول وجديد؛ ونلبس فستان أبيض..
_ إي وترجعي تتعرفي على زوجك من جديد تعيدو ذكرياتكن.. هيك تجديد بالحياة، صحي مايا..؟ إنتي كيف تعرفتي عازوجك احكيلنا.. وكل وحدة تحكي؛ وأنا كمان رح إحكي..
_ أنا كنت مسافرة بالبولمن وهوي كان بنفس الرحلة.. ولماشافني ضل يتطلع فيي ولحقني لما نزلت وضل ورايي لوصلت عابيت خالتي.. وبعدا تعارفنا وهيك تم النصيب..
_ أما أنا لاسافرت ولارحت ولا جيت.. هوي ابن جيرانا بالحارة، وبلشت القصة بكام مكتوب، وسطح بيتن لزق سطحنا.. كنا نشوف بعض ومرة من المرات.. كنا عم نحكي ونضحك عل سطح، راح أخي لقطنا.. وبعدا هوي ماكذب خبر جاب أهلو وخطبني وهيك تم النصيب..
_ ههههه… يعني أكلتي قتلة..؟
_ لاااا… بهدلةماكنة.. وحظر عن السطح.. هاتي لشوف إحكي إنتي..
_ أنا قصتي غريبة شوي.. كنت مرسال بينو وبين بنت كان بيحبا.. وصل مكاتيب من هون لهون.. ومن هون لهون.. بس أبوها للبنت كان رافض رفض قاطع.. وتزوجت واحد تاني.. أنا وقفت لجانبو كاصديقة ماتركتو بأزمتو.. وبعدا صار في تقارب بيناتنا وصار نصيب..
_ شوفو لمى كيف صافنة فينا.. شبك لمى ضل إنتي ماحكيتي هاتي لشوف إحكيلنا..
_ ولله قصصكن متل المسلسلات..!! أنا دعسني بالسيارة.. وبعدا حبيتو كتيرولله.. حب من أول دعسة يعني..
_ ههههه… عم تحكي جد..!!
_ لااا.. بس كلكن قصصكن فيا أكشن إلا أنا؛ قلت بخترع شي شغلة.. أنا حبيباتي زواجي تقليدي.. جماعة أقاربنا دلوه عابيتنا إجا شافني وخطبني وصار نصيب..
_ المهم التفاهم والحب والإحترام قبل كلشي بين الزوجين..
_ إي ولله صح شي أكيد..
_ ياسلااام.. شوفو هل فستان هادا مأحلاه.. لسى أحلى من كل هدوك..
