بانورما طرطوس- دارين العبود:
_ موت وأعرف شوعم تأشرلا من الشباك إلكن ساعة…!! لك وهيي كيف عم تفهم عليك!!! سعيد!! حكيني يارجل…
_ روق عليي ربيع… رح نخلص حكي…
_ هلق هدول حركات كش الدبان بالهوا حكي؟؟ ماتمسك الموبايل وتبعتلا رسائل شوبدك تحاكيا؟
_ لأ ياشاطر … هادا كلام الحب…لغة العاشقين..حتى لو اتطورت التكنولوجيا بيضل التأشير من الشباك موضة ولغة مالازم تبطل بين العشاق..
_ أيوه..!!! طيب وبلكي ياشاطر وانت عم تأشرلا طلعلك أبوا ..أو أخوا.. مثلا يعني..انت متخيل هل موقف مأحلاه؟؟!
_ إي لأ لأ اتطمن مارح يصير هل شي… بعدين أنا بحبا كتير وماعم إتسلى ورح نخطب عن قريب..
_ تخطب!! سعيد إنت خبرتا ل لبنى إنو مبارح بلغوك الدعوى الإحتياطية..؟!
_ لأ لسى ماخبرتا.. بس شوفا رح خبرا، ومارح إتراجع وإتخلى عنا . رح روح وإخطبا من أهلا رسمي..
_ ياصديقي ياسعيد ياعيني أنا بعرف إنك مارح تتخلى عنا.. بس شو بيضمنلك إنو هيي ماتغير موقفا بعد ماتعرف إنك رايح علجيش.. أو أهلا مايوافقوا عل خطوبة..
_ أنا واثق من حبنا لبعض صرلنا سنتين.. بعرف كل تفاصيل حياتا، وبتعرف كل تفاصيل حياتي، ومنعرف طباع بعضن، وكل منا تعود عاوجود التاني بحياتو، لك يارجل حتى صرنا نفهم عابعضنا بالوما شوفة عينك…
_ انشالله يكون إحساسك بمكانو …أنا بعرف أبوها شخص كويس ومحترم هوي صديق أبي… انشالله مايخيبلك أملك وتخطبوا…
_ مابعرف ياربيع حاسس في نبرة حزن بحكيك..!!
_ ما إنت بتعرف وأكبر مثال أخي لكبير، صرلو بالجيش أربع سنين… وانفصل عن خطيبتو.. ماقدر يأمن وضعو للزواج، وأهلها ضغطوا عليها..
_ هلق بالنهاية كل أهل بدن مصلحة بنتن… بس غريب أمر هل ناس!!! يعني بفضل الجيش وتضحياتو نحنا هلق عايشين وعم ناكل ونشرب ونفرح بالحياة…..
_ أخي ماعاد فكر فيها خالص ونسي أمرها… وقلي جملة:” إنو حب الوطن وحب الحبيبة لازم يكملوا بعض بقلب الرجل…ويكون حبها دافع لإلو بالحياة..
بس إذا حب منن بدو يلغي التاني أنا بفضل إختار حب الوطن…” ، هادا كان كلامو..
_ صدقني أنا متفائل وبعرف مارح يرفضوا أهلها طلبي..
_ إذا تم النصيب رح افرحلك من جوات قلبي… ورح إتأكد إنو حبكن مانو مجرد حكي شباك….
